أنا هتكلم معاكم في موضوع ممكن في الأول يبان أنه موضوع عادي بس لو كملتوه للآخر هتفهموا وجهة نظري كويس
الموضوع اللي هتكلم فيه
دور الألعاب في حياتنا ويا ترى مجرد تسلية ولا أصبحت أسلوب حياة؟؟
هكلمكم عن نفسي أولا أنا مجنون وهاو للألعاب بطريقة فظيعة ولكن ليس كل الأنواع فكل شخص فينا في حاجة بتشده وتستهويه أكتر.
زمان واحنا صغيرين كنا كلنا نبص للألعاب دي نظرة ضيقة وأنها مجرد حاجة بنضيع بيها وقت وخلاص، ولكن أما كبرنا فيه اللي أصبح بيهتم بيها للتسلية برضه وفيه اللي مبقاش يلعب خالص وفيه اللي بقت جزء رئيسي في حياته.
الجزء الأول اللي بيهتم بيها للتسلية اللي هو واحد روتيني أو بياخد الحاجات كلها من الظاهر يعني يتفرج عالأفلام عشان يضحك والأكشن وكده ويلعب عشان يضيع ويسلي وقته.
الجزء التاني اللي هو مبقاش يلعب خالص لأنه مش غاويها من البداية وبيشده أكتر الأفلام أو المسلسلات أو غيرها من الحاجات اللي بيستفاد منها وبتسلي وقته في نفس الوقت.
أما الجزء الثالث اللي هو بقت الألعاب جزء من حياته زيي كده D:
ده بقا نظر للألعاب نظرة مختلفة، بصلها ان هي ممكن يطلع منها بالأمل اللي يقدر يعمل بيه حاجة في حياته.
مثال بسيط على كلامي لعبتين من أكثر ما عشقت في عالم الألعاب والاتنين لشركة واحدة وهي EA واستوديو Bioware، اللعبتين دول Mass Effect بأجزائها الثلاثة ولعبة Dragon Age بجزئيها.
لو اتكلمنا عاللعبة الأولى هتشوف اد ايه تطورت الأحاسيس والرسوميات في عالم الألعاب لدرجة أنها بقت أفضل بالنسبة لي من اني اتفرج على فيلم.
لعبت Mass Effect أنا وصديقي العزيز ميدو لأنه عامل زيي كده في الألعاب وعايز أقولكم التلات أجزاء كل واحد فينا كان بيلعب قصة مختلفة عن قصة التاني وكل واحد فينا اختياراته مختلفة على حسب شخصيته لدرجة اختلفت فيها نهاية كل جزء عن بعضنا، وده ما يميز ألعاب RPG أو Role Playing Game واللي انت بتبقى فيها صاحب القرار ومش بتعتمد على سرد القصة زي الأفلام والمسلسلات واللي لو اتفرجت عليها مليون مرة هتبقى هي هي نفس القصة.
المهم في اللعبة دي طلعت بحاجات مفيدة جدا وعرفت إن الواحد فينا لازم يضحي بالكتير عشان يوصل للي عايز يوصله ومش لازم يكون هدف شخصي، ممكن هدف إنساني أو غيره، عرفت ازاي ممكن الشعوب تجتمع تاني على هدف واحد لتحقيقه لو قابلهم خطر ما واللي أتمنى أراه في شعبنا العربي وأتمنى أن أجد مثل شخصية Shepard في عالمنا العربي ليوحد صفوفنا جميعا لهدف واحد.
في لعبة Dragon Age واللي بعتبرها لعبتي المفضلة في الجزء الأول اتعلمت ازاي مأمنش لأي حد وعرفت ازاي ممكن الشخصيات تتلون على حسب المواقف وازاي ممكن تتعامل مع أي حد فيهم، وازاي ممكن تبقى محبوب بين الناس وفي نفس الوقت بتعمل الشغل المطلوب منك، وفي الجزء التاني من اللعبة عرفت ازاي ممكن أبقى الشخصية اللي نفسي فيها، حتى لو بدأت من الصفر ازاي أقدر أوصل للهدف بتاعي واللي نفسي أحققه، عرفت إني حتى لو غلطت لكن أعاتب نفسي على الخطأ ومقولش اهيه غلطة وعدت، عرفت إني لازم أهتم باللي حواليا وان هدفي في تحقيق ذاتي لا يجعلني أنسى من حولي واللي ساعدني إني أحقق ذاتي.
حقيقي لو جربتوا تبصوا للألعاب نظرة أخرى هتلاقوا نفسيكم بجد بطلتم تتفرجوا عالأفلام واتجهتم لهذا العالم الرائع.
آسف للإطالة ولكني قلت الكلام اللي نفسي أقوله لما حد يعرف اني مهتم بعالم الألعاب جدا ميقولش إني شخص تافه ولكن فعلا أصبح عالم الالعاب عالم مختلف تماما.
وفي انتظار الجزء الثالث من الاسطورة Dragon Age
